ដោយ :  បន្ទាយ

សៀមរាប : នាថ្ងៃទី០៣​ ខែកុម្ភៈ​ ឆ្នាំ២០២៥​ លោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្តសៀមរាប បានដឹកនាំមន្ត្រីក្រោមឱវាទ រៀបចំពិធីសូត្រមន្តសុំសេចក្តីសុខ និងដាក់ឲ្យប្រើប្រាស់ទីស្នាក់ការបញ្ជាការស្រាល ប្រចាំតំបន់កម្សាន្ត ផាប់ ស្ទ្រីត( Pub-Street ) ដែលមានទីតាំងនៅលើសួនច្បារទល់មុខសណ្ឋាគារតាព្រហ្ម ក្រុង/ខេត្តសៀមរាប។កម្មពិធីនេះក៏មានការអញ្ជើញចូលរួមពីអាជ្ញាធរដែនដីនិងសប្បុរសជនមួយចំនួនផងដែរ ។

មន្ត្រីក្រុមការងារបានឲ្យដឹងថា: ក្រោមការចង្អុលបង្ហាញដ៏ខ្ពង់ខ្ពស់របស់លោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងទទួលបានការអនុញ្ញាតពីសំណាក់លោកប្រាក់ សោភ័ណ អភិបាលនៃគណៈអភិបាលខេត្តសៀមរាប  ហើយលោកឧត្តមសេនីយ៍ត្រី សៀ ទីន បានផ្តួចផ្តើមក៏បានចាប់ផ្តើមសាងសង់ទីស្នាក់ការបញ្ជាការស្រាល ប្រចាំតំបន់កម្សាន្តផាប់ ស្ទ្រីត( Pub-Street ) ក្នុងថ្ងៃទី២៥ ខែកញ្ញាឆ្នាំ២០២៤។ ការកសាងបានបញ្ចប់ការនៅថ្ងៃទី៣១ ខែធ្នូ ឆ្នាំ២០២៤។

ប្រភពខាងលើបានបន្តថា:  ការកសាងទីស្នាក់ការបញ្ជាការស្រាលនៅតំបន់ផាប់ ស្ទ្រីត ក្នុងគោលបំណងបង្កើនភាពកក់ក្តៅដល់ប្រជាពលរដ្ឋផ្នែកសន្តិសុខ សុវត្ថិភាព និងងាយស្រួលក្នុងការអន្តរាគមន៍ជូនប្រជាជនរស់នៅតំបន់ ក៏សម្រាប់ភ្ញៀវទេសចរផងដែរ។

គួរបញ្ជាក់ផងដែរថា ទីស្នាក់ការបញ្ជាការស្រាល ប្រចាំតំបន់កម្សាន្ត Pub-Streetនេះ ក៏មានការចូលរួមឧបត្ថម្ភពីសប្បុរសជនមួយចំនួនរួមមាន៖

១.លោក សើ វណ្ណដា និងលោកស្រី ព្រេម សុគន្ធា ព្រមទាំងបុត្រ, ២.លោក ឡុង ចាន់រិទ្ធ និងលោកស្រី លឿម ស៊ីណា, ៣.លោក គង់ ឡាយហេង និង៤.លោក កង សុទ្ធី និងលោកស្រី ចាន់ ហ៊ុយជូ ព្រមទាំងបុត្រផងដែរ ៕